රාත්‍රිය මම වෙමි ය - ගුණදාස කපුගේ

Rathriya Mama Wemiya - Gunadasa Kapuge

රාත්‍රිය මම වෙමි ය
සුදු සුමුදු මල් කැකුළ
පිනිබරව හෙට උදෑසන පිපෙන
මල් කැකුළ
ගනඳුරේ සැඟව ඇති
ශාන්‍තිය හා නින්ද
ඔබට පුද දී දෙනත
පියා හිඳිනෙමි සොඳුර

මලක් වී හෙට උදේ
ඔබ පිපෙන සුබ මොහොත
කලක් සිට මම බලාගෙන
හිඳිමි පිය කැකුළ
වසන්තය සේ පැමිණ
හොරෙන් යම් කිසි දිනෙක
ඔබේ පෙති අතර පිනි
බිඳක් වී සැඟවෙමි ය

රාත්‍රිය මම වෙමි ය.....

ඔබ එළිය වූ මොහොත
මම අඳුර වෙමි සොඳුර
ඔබ ජලය වූ සඳෙහි
මම පවස වෙමි නිබඳ
දිග ම දිග රාත්‍රිය
සෙමෙන් පියවර මනිත
ඵලක් වී නෙත් හරින
ඒ ප්‍රභාතය ඔබය

රාත්‍රිය මම වෙමි ය.....

ගායනය: විශාරද ගුණදාස කපුගේ
ගී පද: ඩබ්.ඒ. අබේසිංහ
සංගීතය: විශාරද ගුණදාස කපුගේ

පැන මඩ කඩිති - සුනිල් එදිරිසිංහ

Pena Mada Kadithi - Sunil Edirisinghe

පැන මඩ කඩිති වැව් තාවලු වැහි කාලේ
පෙන්නා මග නොමග නොවැටී යන තාලේ
සිප් කිරි පෙවූ මූසිලයින් උඩු මාලේ
අපෙ ගුරුතුමා යයි තාමත් ඉස්කෝලේ

සාමා අමර විකුණති බස් පොළේ කජු
කුමාරෝද පිටු දන් දෙති එයින් මතු
උගත මනා ශිල්පය පිල් කඩ නොපැතූ
වේවැල වටා ඉකිබිඳ දඬුවමක් පැතූ

රන්මසු පටපිළී අබරණ උරණ වෙලා
සමන්පිච්ච කැකුළිය ගෙයි මිලින වෙලා
ගුරු නිවහනේ කඳුළට උල්පතක් වෙලා
ලොකු හාමිනේ ඇත බිතු සිතුවමක් වෙලා

ගායනය: සුනිල් එදිරිසිංහ
ගී පද: මහින්ද චන්ද්‍රසේකර
සංගීතය: ආචාර්ය රෝහණ වීරසිංහ

නෙතු දැහැන් බිඳී - එඩ්වඩ් ජයකොඩි

Nethu Dehen Bindee - Edward Jayakody

නෙතු දැහැන් බිඳී
හද විමන් වදී
සුරඟනක් වගෙයි කුමරී
සෙනෙහසින් වැදී
සිත ගිමන් නිවී
පෙම් කවක් ලියයි මිහිරී

ඝනඳුරෙන් මිදී
තරු ‍රැහැන් ඇදී
සිහිනයෙන් වඩී කුමරී
මීදුමෙන් ඇදී
සිසිලසින් එතී
නෙතු අගින් බලයි සොඳුරී

නෙතු දැහැන් බිඳී.....

හසඟනන් පිරී
පෙති පියුම් ඇරී
කළඹවයි විලේ වැතිරී
සඳ කැළුම් රිදී
තුරු අගින් මිදී
නෙක දසුන් මවයි කිඳුරී

නෙතු දැහැන් බිඳී.....

ගායනය: එඩ්වඩ් ජයකොඩි
ගී පද: සරත් ආනන්ද ඩිරෙක්ස්
සංගීතය: කලණි පෙරේරා 

ලොව නිසසල වී - නිරංජලා සරෝජිනී

Lowa Nisasala Wee - Niranjala Sarojini

ලොව නිසසල වී නවතින මොහොතේ
යටි හිත් මතුකොට සිනහ සලා
ලොව දොඩමළු වී නෙත් මානන කල
අප දෙදෙනා ඉමු තරහා වෙලා

තුඩින් තුඩට ගොස් අප ගැන තොරතුරු
බොඳවී යයි ආදරයක ලස්සන
දෙහිතෙහි හිරවී ඇති තුරු පමණයි
අප දෙදෙනාගේ කතාව ලස්සන

ලොව නිසසල වී.....

අනුන් සිටින විට විමසිලි දෑසින් 
නෙත් සඟලින් හෝ ඉඟි නොකරනු මැන
සිතින් දෙදෙන එක තැන ඉන්නා බව
දෙතොල් තෙරපලා ගොළු කරගනු මැන

ලොව නිසසල වී.....//

ගායනය : නිරංජලා සරෝජිනී
ගී පද : ප්‍රේමකීර්ති ද අල්විස්
සංගීතය : ආචාර්ය වික්ටර් රත්නායක 

දඟගෙයි දඬුවම් - විජය කුමාරතුංග

Danga Geyi Danduwam - Vijaya Kumarathunge

දඟගෙයි දඬුවම් සියුමැලි වැඩි නම්
අළුගෝසුවනේ එල්ලාපන් 
අළුගෝසුවනේ එල්ලාපන් 
කටු ඉඹුලේ අප එල්ලාපන් 

යුක්තිය උදෙසා කෑ මොර දීමයි...//
දඟගෙයි ලෑමට අප සැම කළ පව 
මුඛවාඩම් බැඳ එකෙකු නසන කල 
දනිව් සුවහසක් තව උපදින බව...

වරදට එරෙහිව අවි ඔසවන්නේ...// 
රටකට දැයකට හිත ඇති මිනිසුන් 
ශාන්තිවාදී තපස් රකින්නේ 
පිට කොඳු බිඳගත් ඔළමොළ නිවටුන්...

දඟගෙයි දඬුවම්.....

ගායනය: විජය කුමාරතුංග
ගී පද: මහාචාර්ය සුනිල් ආරියරත්න
සංගීතය: ගුණදාස කපුගේ

ගීතයක සැබෑ හිමිකරු කවුද?

ගීතයක අයිතිය සම්බන්ධයෙන් මේ වන විට දැඩි මතවාදමය තත්ත්වයක් මෙරට තුළ උද්ගත වී තිබේ.

මීට පෙර සංගීත නිර්මාණ ශිල්පීන්, පද රචකයින් සහ ගායන ශිල්පීන් තුන් පත් රෑනක් සේ එකට බැඳී සිටිය ද මුදලෙහි බලය ඉස්මතු වී මේ පාර්ශව තුන එකිනෙකාට එරෙහිව අවි අමෝරාගෙන සිටීම ජාතියේ අභාග්‍යයකි.

ගීතයක අයිතිය සංගීත නිර්මාණකරුවා, පද රචකයා සහ ගායකයා යන පාර්ශව තුනට ම අයත් බවට මෙතෙක් පිළිගැනිණි.

ගායන ශිල්පියාට ගීතයේ අයිතියක් හිමි බව එච්. ආර්. ජෝතිපාලගේ සහ තවත් ගායකයින් කිහිප දෙනෙකුගේ නිර්මාණ සම්බන්ධයෙන් දුන් නඩු තීන්දුවලින් ද තහවුරු වී තිබේ.

කෙසේ වෙතත්, තනු නිර්මාණකරු සහ පද රචකයා පමණක් ගීතයේ අයිතිය උසුළන බවට මතවාදයක් මේ වන විට මතුව ඇත.

ඒ අනුව, තනු නිර්මාණකරුවන් සහ පද රචකයින් තර්ක කරනුයේ ගීතය ගයමින් ගායකයා මුදල් උපයන බැවින් ඔහු උපයන මුදලින් කොටසක් තමන්ට හිමි විය යුතු බවට ය.

මේ වන විට ප්‍රවීණ ගායකයින් කිහිප දෙනෙකු ගැයූ ගීතවලට ලක්ෂ ගණනින් මුදල් ඉල්ලා නොතීසි නිකුත් කර ඇතැයි වාර්තා වේ.

ගායකයා ගීත ගයමින් මුදල් උපයන බව සැබෑවකි. එහෙත්, තනු නිර්මාණකරු සහ පද රචකයා වෙහෙස වනුයේ එක් වරක් පමණි. ගායකයා මුදල් උපයනුයේ ගීත යළි යළිත් ගැයීමෙනි.

අනෙක් අතට, ගායකයෙකු ගීතයක් නොගයා සිටී නම් තනු රචකයාට සහ පද රචකයාට සිය නිර්මාණ හමස් පෙට්ටියේ තබාගෙන උඩ බලාගෙන සිටිනු හැර කළ හැකි අන් යමක් නැත.

මේ හේතුවෙන්, ගායකයාට ගීයක අයිතිය හිමි නැති බවට තර්ක කිරීම යුක්ති යුක්ත නොවේ.

තව ද, යම් ගායකයෙකු පෙර ගයන ලද අවස්ථාවලට අදාළව වන්දි මුදල් ඉල්ලීම ද සාධාරණ නැත. ඉදිරියේදී මුදල් උපයන අවස්ථා වෙනුවෙන් යම් කොටසක් ගායකයා සමග ඇති කරගන්නා ගිවිසුමක් මත ලබා ගැනීමේ හැකියාව සෙසු නිර්මාණකරුවන්ට තිබේ.

මෙම අර්බුදය හොඳින් අවසන් නොවුණහොත් ගායකයින් තමන්ගේ පද රචනා ගැයීමට යොමු වනු ඇත. එය ගීතවල සාහිත්‍යමය අගය හීන වීමට බලපානු ඇත.